سپر اسٹار رجنی کانت نے اعلان کیا کہ آئندہ اسمبلی انتخاب میں تمل ناڈو کے عوام کی بھرپور حمایت سے ایک ایماندار، شفاف، بدعنوانی سے پاک، سیکولر روحانی سیاست ہوگی، جنوری میں وہ اپنی سیاسی پارٹی کا باضابطہ اعلان کریں گے
تمل ناڈو، 4 دسمبر / جنوبی ہند کے سپر اسٹار رجنی کانت نے جمعرات کو سیاست میں آنے کا اعلان کرتے ہوئے کہا کہ وہ جنوری میں اپنی سیاسی پارٹی کا باضابطہ اعلان کریں گے اور اس سلسلے میں 31 دسمبر 2020 کو ایک اہم اعلان کیا جائے گا۔ اس کے ساتھ ہی رجنی کانت نے تمل ناڈو کی سیاست میں اپنی واپسی کو لے کر لگ رہی تمام قیاس آرائیوں کو بھی ختم کر دیا ہے۔
مشہور اداکار نے ایک ٹوئٹ کے ذریعہ سیاست میں چمتکار دکھانے کا اعلان کرتے ہوئے کہا کہ ’’آئندہ اسمبلی انتخابات میں تمل ناڈو میں لوگوں کی بڑے پیمانے پر ملی حمایت سے ایک ایماندار، شفاف، بدعنوانی سے پاک، سیکولر اور روحانی سیاست ہوگی۔ چمتکار ہوگا۔‘‘رجنی کانت نے ایماندارانہ سیاست کا وعدہ کرتے ہوئے دعویٰ کیا کہ ان کی پارٹی آئندہ اسمبلی انتخاب لڑے گی اور جیتے گی۔ انھوں نے بھروسہ ظاہر کیا کہ ان کی پارٹی لوگوں کی زبردست حمایت کے ساتھ انتخاب جیتے گی۔ اس سے قبل پیر کے روز رجنی کانت نے چنئی میں اپنے حامیوں کے ساتھ صلاح و مشورہ کیا تھا اور میٹنگ کے بعد انھوں نے کہا تھا کہ وہ سیاست میں داخل ہونے کو لے کر اپنے فیصلے کے بارے میں جلد مطلع کریں گے۔
ایک تبصرہ شائع کریں