رکن پارلیمنٹ اعظم خان اور ان کے اہل خانہ کو جیل میں ہی رہنا ہوگا، ضمانت کی عرضی پر آج فیصلہ سناتے ہوئے الہ آباد ہائی کورٹ سنگل پنچ نے ان کی عرضی خارج کی
اترپردیش،26 نومبر (یو این آئی) سماجوادی پارٹی کے قدآور رہنما اور رامپور سے رکن پارلیمنٹ اعظم خان ان کی بیوی تزئین فاطمہ اور بیٹے عبداللہ اعظم کی ضمانت کی عرضی پر آج اپنا فیصلہ سناتے ہوئے الہ آباد ہائی کورٹ کی سنگل بنچ نے ان کی عرضی خارج کردی۔ اعظم خان کی جانب سے داخل ضمانت کی عرضی پر سماعت کرتے ہوئے جسٹس سنیتا کماری نے گزشتہ 19نومبر کو دونوں فریقین کے دلائل سننے کے بعد اپنا فیصلہ محفوظ کرلیا تھا۔ انہوں نے آج اعظم خان مع بیوی و بیٹے کے ضمانت کی عرضی پر اپنا فیصلہ صادر کرتے ہوئے ضمانت کی عرضی خارج کردی۔ ایس پی رکن پارلیمنٹ و سابق کابینی وزیر رامپور میں سرکاری زمین پر قبضہ کرنے، وقف املاک کو غیر قانونی طریقے سے جوہر یونیورسٹی میں شامل کرنے اور بیٹے کے فرضی تاریخ پیدائش سرٹیفکیٹ بنوانے کے الزام میں بیوی تزئین فاطمہ اور بیٹے عبداللہ کے ساتھ سیتا پور جیل میں قید ہیں۔ واضح رہے اعظم خان سماجوادی کے قدآور رہنما ہونے کے ساتھ ساتھ پارٹی کے مسلم چہرہ بھی ہیں اور ملائم سنگھ کے قریبی ساتھیوں میں سے ہیں۔ سماجوادی پارٹی کی جانب سے اعظم خان کے حق میں کوئی بڑی تحریک نہیں چلائی گئی ہے اور ایسا محسوس ہو رہا ہے جیسے ان کو ان کے حال پر چھوڑ دیا گیا ہے۔
ایک تبصرہ شائع کریں